السبت - 19 أيلول 2020
بيروت 25 °

في لبنان: أمور لن يشتريها المواطن بعد اليوم

ربيع الحسامي
في لبنان: أمور لن يشتريها المواطن بعد اليوم
في لبنان: أمور لن يشتريها المواطن بعد اليوم
A+ A-

بظل هالأزمة الخانقة يلي عم يمرق فيها لبنان ، و بظل الاوضاع المعيشية الصعبة و فايروس كورونا المستجد، في كتير أشخاص خسروا أشغالهم واضطروا يقعدو ببيوتهم. وبما إنو الدولار صار ب 6300 ( حتى اللحظة )، و بما إنو الليرة اللبنانية قيمتها عم تتراجع كتير، خلونا نشوف شو كنت تجيب، وشو بطلت قادر تجيب .

أول شي انسى شي اسمو كماليّات ، شاشة تليفونك المكسورة دبر راسك ، لزقها ب بلاستر ! لأن اذا كانت تكلفك 50 $ عال 1500 ليرة، بعدها بتكلفك 50 $ بس عال 6000 !

via GIPHY

تاني شي ، لما كنت تنطر البلاك فرايدي لتروح تقش تياب عن أبو جنب و تدفع ربع القيمة ، هلق بلاك فرايداي شخصيّا مابقى معو مصاري. يعني مدام، شوووبيننغ ؟ انننساا !

الجينز لكان 100 ألف ، نفسوا ذاتو صار ب 600 ألف ، كيف ليش ماحدا بيعرف! و السكربينة يلي كنتي تقرفي بس تشوفيها صارت غالية ، فهلق بتصير تعجبك !

via GIPHY


تالت شي، بس تسمع إبنك عم يقول "جاي عبالي لحمة" عمول حالك نايم، و اذا صار يبكي كتير مسكلو ايدو و خدو عند أقرب لحام و لي يسلم عفخد البقرة عن بعيد، وإذا صار يبكي كتير وأحرجك بالشارع خدو خلي يبوس البقرة عن قريب وصوروا معها ! لأن كيلو اللحمة صار ب 60 الف، يعني بتمشي الهمبرغر بلا لحمة، بس خبز، والمشاوي بتقطع إذا بس عم تشوي سياخ، لعبلو عالنفسية. مافي لحمة، لحمة مافي .

via GIPHY


رابع شي ، إذا انتزع شي بسيارتك معليش، إنكسرت مراية،إنتزع شباك،انقبع باب، امشي متل ما إنت لأن بدك تبيع كليتك اذا بدك تغيّر زيت!

via GIPHY


خامس شي، و منعتذر عن قساوة المشهد، حبيبي وحبيبتي، بتقطع بلا عرس، بتقطع بلا " هشك بشك " بأفخم صالة، أصلا بس كان الدولار 1500 ما اتجوزك ، كيف رح يتجوزك عال 6000؟؟

via GIPHY


سادس شي، اذا معود تصحصح عكباية القهوة السريعة، بحب خبرك أرخص مرطبان القهو وسط صار 17000، اتصل فيني وانا بجي بضربك كف كل يوم الصبح بخليك تصحصح وباخد منك 2000 ليرة .

via GIPHY


و بالنهاية ، رغم قساوة هالأيام الا انو لازم كلنا نتبع مقولة خبي قرشك الأبيض ليومك الاسود! و الله يفرجها عكل الناس و ترجع الحياة متل قبل!


الكلمات الدالة