"يبن الحكم والارادة حكاية مشوار بطل، حلم بالمستحيل ليكون وطن...
وطن غيرلو ثياب الحرب، وبسفينة طموحو، شق امواج الاحتلال والوصاية والاهتراء والاستزلام...
عمّر، علّم، ملأ الدني بصرخة بطل: إيدكن عن وطني بانسانو وحضارتو وارضو... بشعبو وجيشو ومقاومتو، اللي حملهن بصدرو...
وبلحظة سودا، ايادي سودا تسللت ليكون 14 شباط وعد للجريمة مع استشهاد هالبطل بأـحلامو... والوطن بوجودو.
وكان القسم... وكانت الثورة... وصارت الحكاية مشوار نهج رواها رجال كبار بدمّن وبعدا ندر لكتار... ورح ينوفا...
يا بطل من هون... شو سرّك؟
نائم ع كتف العاصمة... وبعدو صوتك هدير... غفوة بكل بوعي الدني... حلمك سر... وهدف منحلمو... منحلمو... لا؟ هو درب... هوي نهج... هوي حكاية وطن وكمشة مبادئ وقيم واعتدال.
كيف عرفت وانت البعيد بالجسد، انك خميرة لدرب ومستقبل...
كيف عرفت انو ولو غفيت عينك في رجال سهراني...
شو سرّك يا بطل...
بعكس رزنامة التاريخ مشيت ومشينا...
كتار انتسو... وانت باقي وبتزهّر... كيف صارو هني ذكرى... وانت بعدك حقيقة...
حقيقة مشروع لقايد بصماتو خلّدتو، والتاريخ صار ورقة بدفترو.
ويا سطور دفترو لو حكيتو شهدو... ع اقزام المصلحة شهدو...
ع اللي غدرو شهدو... وع رجال الوفا شهدو...
رجال زهرت فيهن سنابل نضال وتضحية وعناد وحصادن مبارج اللاوصاية... اليوم حقيقة... وبكرا عدالة... دربن نهجك، رسالتن احلامك، واحلامن وطنك اللي رسمت، ت يكون لبنان أولا.
وانت يا 14 شباط، يا يوم مسخ بالرزنامة، الغدر سطّرك بزيحين سود وزلّك قدام بقية الايام... دم طاهر، تلون بغبرتك السودا... ولهيب نارك حرق قلوب وقلوب، وأنهر دمع فاضت... ومثل ما وعدناك منقلك يا يوم 14 شباط انقلبت الطاولي عليك ورح تتعلق المشانق لكل راس خطط... ونفذ... ورح تنقطع ايد الشر اللي بعدا عم تتحكم بهاالوطن.
وإلَكْ يا بطلي، يا سيد الشهداء،
ع عرشك وردي بلون الوفاء، والحب والشوق، وكلمتين زغار: كلنا رفيق...
وانتَ المجد...".

نائب بيروت