رسالة من عُمَر ريمون جبارة الى أبيه

23 نيسان 2015 | 11:07

يلاّ. يلاّ... هالكلمة يلّلي ضلّيتك تعيدا ع تكرار الوقت: يلاّ تقبرني. هلّق. يا ريت كان فييّ أعرف شو بدّك، شو عايزك، لوين بدّك تروح. يلاّ بيّي. هلّق منروح. خلّينا نضهر نمشي سوا، نسمع عصافير الدوري عم تحكينا، نمشي سوا بين الصنوبر والخرّوب والزعتر البرّي.

يلاّ. يلاّ نشمّ الهوا وريحة الأرض. نمشي سوا ونحكي. نحكي كأنو الوقت معنا. لإلنا وحدنا.
يلاّ. يلاّ يا بيّي، نمشي قبل ما يجي الليل ويسرق منّا سحر هالنهار. خلّينا نرجع سوا قبل ما تغيب الشمس. بكّير لتمشي بعد. بكّير. شوي خلّينا نرجع سوا. ماشيين سوا.

يلاّ. يلاّ تقبرني. تأخّر الوقت. خلّيني ضلّ ماشي... ع صوت العصافير وضوّ الشمس. أنا منيح هون.
يلاّ. يلاّ حبيبي. الله يكون معك. خلّيك ماشي ع طريق السما. هونيك ما في ليل، وما في وجع.
يلاّ يا بيّي. يلاّ تقبرني. لوقت ما نرجع نجتمع. إبنك.

إظهار التعليقات

يلفت موقع النهار الإلكتروني إلى أنّه ليس مسؤولًا عن التعليقات التي ترده ويأمل من القرّاء الكرام الحفاظ على احترام الأصول واللياقات في التعبير.

Digital solutions by WhiteBeard
Digital solutions by WhiteBeard