الأحد - 26 أيار 2024

إعلان

عصفور الفجر

المصدر: "النهار"
سليمان بختي
لوحة "باليه العصافير"- تعبيرية.
لوحة "باليه العصافير"- تعبيرية.
A+ A-

 

مبارح وعيت بكير

في عصفور وقف ع شباكي وصار يقول

وما بعرف شو بيقول

بس كأنو الحكي إلي

وأنا ما كتير بسمع الكلمة

حبيبي العصفور عازمني على  مشهد

عمره آلاف السنين

وبيضل جديد

كان الفجر نازل بالدني تبييض

بيفتح الصفحة

وبيمحي السطور السود

معو حق...

الصفحة البيضا

أحلى ألف مرة

من الخيام السود

والبياض أغلى من الحرية

***

كان الفجر جايي

متل الغنية اللي بتقول

"جايي أنا جايي

قطعت مية وادي

وسبقت النواطير"

متل عرباية الأمير

مرقت على كل البيوت

كان الفجر جايي

متل إجانا صبي

متل صلوا على النبي

متل على الأرض السلام.

يا الله شو حلوي الدنيا بكير

كيف بتخلقها من جديد وبتضلا حلوي

كأنها إلك ومش إلك

خيط نور

بيجي من السما

وبيضوي بقلبك

وما بتحس عَ حالك

إلا وعم تشكر ربك

يا عصفور

بشكرك ع العزيمة والهدية

بشكرك من قلبي وعينييّ

مرة الجايي

حاكيني وبضل إسمعك

مرة الجايي

ياريت بتاخدني معك

الكلمات الدالة

حمل الآن تطبيق النهار الجديد

للإطلاع على أخر الأخبار والأحداث اليومية في لبنان والعالم