الجمعة - 19 نيسان 2024

إعلان

يا ريت ما كبرنا

المصدر: النهار
سليمان بختي
لوحة "أطفال سعداء" للرسام الألماني بول بارتل.
لوحة "أطفال سعداء" للرسام الألماني بول بارتل.
A+ A-

 

لمّا كنا زغار

استعجلنا لنكبر

ونشوف العالم

ولمّا كبرنا

شفنا العالم

وهم كبير

وشي بيخوّف

وقلنا يا ريت

بترجع إيام الطفولة

 

لمّا كنا زغار

كنا نلعب أبطال وحراميي

ودايما كانوا يربحوا الأبطال

ونضحك كتير

ولمّا كبرنا

لقينا الحراميي ربحوا

وفلوا الأبطال

وصرنا نبكي كتير

 

لمّا كنا زغار

كنا نتعارك مع بعض

حتى الخصام كان شريف

نتصالح بالأصابع

ونسنكف  بالأصابع

متل كأنك وقّعت الفارس عن الحصان

أو وقّعت الطربوش

كان الغفران أقوى وأسرع

 من كل شي

 

لمّا كنا صغار

كنا نطلّع بالسما ونعد النجوم

ومرات نسمي النجوم بأسامينا

ونزعل إذا هالنجمة وقعت

أو غيرت مطرحا

هلق سما بلادي بلا نجوم

وما في ولاد عم يلعبوا

 

لمّا كنا زغار

كنا نحس إنو في حدا معنا

في ملاك على الكتف

في صوت بالقلب

في حدا شايفنا من بعيد

لمّا كبرنا

صرنا كل واحد لحالو

متل "الأيتام على مائدة اللئام"

 

لمّا كنا زغار

كنا نشوف الوطن بالنشيد

وكل يوم نغنيه

ونقول بدنا نكبر

لنحمل العلم ونرفعو ونعلّيه

ولمّا كبرنا

كان الوطن وجعنا الكبير

ومنخاف يجي يوم

لا وطني يعرفني

ولا أنا أعرفو

وأهل الوطن

يصيروا ما حدا.

الكلمات الدالة

حمل الآن تطبيق النهار الجديد

للإطلاع على أخر الأخبار والأحداث اليومية في لبنان والعالم