السبت - 15 أيار 2021
بيروت 22 °

إعلان

حطّاب الليل

المصدر: "النهار"
سليمان بختي
الليل.... لوحة لليو ليزر يوري.
الليل.... لوحة لليو ليزر يوري.
A+ A-
حطّاب الليل
طلع الصبح بكير
مش مصدق حالو
وتمرجح ع شجرة الهوا
مرتاح ع بالو
وصار يكرّ خيوط الشمس
رش بودرة عالقمر وطفى النجوم
ببياض قلبو
هج الحمام وسكر بواب المنام
فيّق العصافير والديوك
طلع ع الميدنة
وعلا صوت الاذان
صلوا على اسم النبي
وفتح البواب والبرادي والشبابيك
وكشح العمش عن العيون
وحط المي بالركوة والفنجان
وقللو للحارس ما تخاف
بكرا انا جايي
ولو تأخرت شوي جايي
متل اليوم متل كل يوم
واذا شوي ما شفتني
اتطلع بشمس قلبك
بتقشعني قبالك
لا تخاف ولا تتلبّك
هيدا الصبح هوي ذاتو
ما بيطلع اذا ما ساعدو قلبك
هيدا الصبح بينام حدك
وبينتبه لحالك وحالو
بيحطّب الليل
وبيخاف يوعيك لوحدك
بيعزم كل الدني
ت يقلك: شو بحبك.

 
الكلمات الدالة

حمل الآن تطبيق النهار الجديد

للإطلاع على أخر الأخبار والأحداث اليومية في لبنان والعالم