اشترِك في نشرتنا الإخبارية
وبيسافر بيي
ورا طرقات بعيدة
واسأل امي كل يوم
ايمتى بيرجع بيي
تقول بعد سبع ليالي نوم
وانا صير نام بعد الضهر
ت جمّع من الغفى وعد
وما يرجع بيي بعد
الوجع مش وجع الزمان
ولا وجع المكان
الوجع الحقيقي هو اللي بياخد
الانسان من الانسان
* * *
بيي لما راح
قالولي: العمر الك
عطاني عمرين
عمر شفتو قدامي
وعمر انزرع شجرة بكياني
وكيف بيقولو
الاهل يا ربي ما الهن اعمار
وما بيتكرروا بالمرة
وكيف بيكسروا المسافة
بين جوّا وبين برا
وكيف بتحسّ متل
كأنهن دابو بقلبك
وصرت شخص تاني
مره قاسي
ومره حنون
ومره مجنون
وبتشوف وجه بيك فيك
ضحكتو... دمعتو
عكازتو وطاقيتو
عويناتو ودخان سيكارتو
وجعو الصامت وحسرتو
ومن دون ماتنتبه
بتعيد كلماتو
وبتعرف انو العمرين متل نهرين
صاروا بحر واحد
ولوين يا بحر... لوين؟
