مِتل لْ عِطر يا زَهر ئَلبي فاح/ جِسمِك إِنوسي، بَس ما نْطرتي/ تَ لْ عِطر يِبْعَت فَوِحْتو ويِرْتاح

نستعيد من "ملحق النهار"، العدد الصادر في 4 تموز 2015، مجموعة من الأعمال التي كتبها #موريس_عواد، كتحية لروحه بعدما فارقت الجسد اليوم.

Tentation

مِتل لْ عِطر يا زَهر ئَلبي فاح

جِسمِك إِنوسي، بَس ما نْطرتي

تَ لْ عِطر يِبْعَت فَوِحْتو ويِرْتاح

لَون الصِبا، عَ وِجِّك وصِرتي:

يا حُب وينَك؟ لَوَّح التفّاح!

وتِمِّك لْ كِلّو شْفاف حَمَّرتي

يا شَعْرها السِتَّعْش طير، سْباح

بْ بَحر لْ عْيون، تْمايل، كْبِرتي.

ما تْحِطّو عَ طَريئا زْياح

ولا لْ خَطييّ لّي بْتِجي وِرْتي.

نْ كنَّك خَمِر يا حُب صِبّ طْفاح

بْ زِنّار لَون لْ خَمر زَنّرتي

خَصْرِك. يا غِمري ومِن عْيونِك لاح:

صِرتي مرا. لْ فِسطان ئَصَّرتي

وشَعْشَع بياضِك يا بياض شْلـاح

النِفْناف بِيدَفّي. وْدَوَّرتي

عِشَّين صِدْرِك. آه! رَبّي سْماح

بْ غَمرا. وعَ وَهِج لْ حب زَهّرتي.

وحِبِّك أنا، يلّا يا ئَلْبـي فْتاح.

جايي لْ حَنوني. لْ حب دَرْدَرْتي

بِ بَيتنا، وعْطِيتـِك لْ مِفتاح

إنتي فْتحي. ولْ بَيت عَطَّرتي

وصِرتي تِجي: لْ بَوسات صارو جْناح

ويا ما عَ تَخْت لْ لّيل فَرْفَرتي

غْمِرني! غْمِرني! بَعد، دُوب، رْشاح

شَهوي وحَنان. وكيف مَسمَرتي

جِسمِك عَ جِسمي وغَمِرتِك تِجْتاح

إِيام عِمري. ولَيلِتا نْدَرتي

جسمِك إِلي والسِرّ كِلّو نْباح.

كِلِّك نَئا وِلْ بَوْح كَتـَّرتي.

وإزا غْلِطنا، تْعا يا حب مْساح

لْ غَلطا. ومِش بِلْ غَيم عَمّرتي

ئْصور لْ حِلم. ما في إزا وأَشباح

بَيناتنا. وفَجْئا، تَغيَّرتي.

مين لْ مَرَء؟ حَط الظنون وْراح

تارِك عَ وِجِّك غَمِزتو. دِرتي

ئَلبِك لَ صَوبو. آخ شو لّي نْزاح

من مِطرَحو تَ لْ حب سَكّرتي

بْ وِجّي؟... - بحبِّك. - إِنت فِلّ. سْراح

حَنّونتي! - شو ئِلْت؟ ونْكَرتي

نِدرِك إِلي. النِكران شَك رْماح،

وصَحوِة عْيون الزِّرء عَوْكَرتي.

ئِلت بكرا بْتِرجَعيلي، وْصاح

ديك لْ بِكي عَ الصبح، ما زْكَرتي

وَعدِك إِلي تَ راح يلّي راح

ولْمَحتِك مْنِ بْعيد خَتيرتي.

* * *

نْئائيط مش عَ السطر

أكتَر من عْشَئنـي

وْلـاع، وولِّعنـي، غْراء

بِ حِضن لْ حبّ، غْرَئنـي

مش غَرئِة لْ عِشّاء.

تَمتِملي: جِسمِك عيد

لْ أرض. نْئائيط نْبيد

حَلماتِك. عَم دُوخ

تِطليع. وكيف دْواء؟

أُوعا النَئا يبوخ

أو يدبَل. أنا طِفلِك

فِجعانِك، رَخروخ

حِضنِك، عَم شَفِّفْـلِك

الرجفي لْ مِستحييّ.

رجّوفتي، وإرجفلِك

بَرّات لْ خَطييّ.

شِيلـِك مَرا

+ ئِدّوسِك، ئِدّوس

شو مِشتهي بُوس

وإغمُر كِل النِسوان

بْ جِسمِك!

أنا؟

+ أى يا أنا.

هِنّي شـمِّة لْ فِسطان

وإنتي شيلـِك مَرا

كوبّوني 1. شَيلـان

"لْ حِبِّك أنا"... لْ عِطر

والشهوي مْئَطّرا

عَ جمرِة لْ حنان.

وشيلـِك أوّل سَطر

بِلْ ئَصيدي التِحفي

وسَطْر لّي بْ آخرا.

يا لْئـيّتـي. وشيلـِك

النَئييّ، الدّخيلـِك

لْ مَغطوطا بِلْ لّهفي.

والنُوتا... تْغنّيلـِك:

يا إنتي لْ من زمان،

ومن أوّل الزمان

بْرَمت عْليكي، لْئيتـِك

نْسيت بْ أيّا وَين.

لَمحتِك بْ عَين

وبْ عَين شْتَهَيتـِك.

* * *

بيت لْ حبّ

عَبالي إِصِمْدِك

بْ تَبرنَكْل ئَلبي

ئِربان

لْ حَنان.

وإتناول بِلْ لّيل

بَياضِك عَلْ لّيل

ويسامِحني رَبّي.

* * *

وَجِعّني

كَلْوِنّي بِ جنون

الشهوي. وِنْوِجعْني.

مِشتهييّ تكون

لْ مَشبوء

فييّ ودُوء

إنَّك بتوجعني،

وكِل لْ بائي ظْنون.

غَمْغِرني. وجِّعني

لْ وَجَع لْ حَنون.

* * *

رَيتني ما إشبع

Les littérateurs de profession ne peuvent pas vous comprendre.

Vous projetez trop d'âme dans vos écrits. (Mme Carraud à Balzac)

شو بْتِشبهي إمِّك:

جِسمِك بائِة مَرا

يا زَهرِة لْ مَرا.

زَهرا وزَهرا شِمِّك.

من شَعرك لْ صِدرِك

لْ كِلّو غِنج، لْ خَصرِك

تِـمويـجـِة لْ جَمال.

يلّـا يا وَجّي غِلْ

بُوس لْ بِئي مْنِل

"كوردون أُمبِليكال".

لِلْ حِرج الزهّرني!

شِمّ

لْ مَرا، لْ إم.

والرَيتو يئبرني!

نَغْـنِغلو

دَغْدِغلو

لَهلِب شَهوي. وْضيع!

تكْـتِكلو

فَرفِكلو

برعُم الربيع.

+ "سِرّك" أنا!

إى.

إى. بالتلـات صابيع

غَـنِّجنِجلي ياه!

من الشِفّي للشِفّي.

+ دَخيلو لْ بيدفّي

وبيـبورِد. شو دْفينا

لِمّ لمّن شِفناه

عن صَبْـيَنـي... غْشينا.

وشو رْجِفنا

عَ خِفنا

يوم لّي دِئناه

بِلْ ئَبو، شو حْلـِمنا

وصَلّينا وبَرَمنا

وعَـيّطنالو يا ...

وينَك؟ تَ لْئيناه

بيوَلِّع

بيرَكِّع.

ويَ مَ أنا راكِع

بين شْفافو راكِع

نُولَع أنا وياّه.

ولِم ينطفي لْ والع

ونِجي تَ نِتْوَدَّع:

نْطرني مش رَح إِشبَع

منَّك، - أنا راجع.

* * *

عْطيني لْ حَبْتَـين

ريتُن يئبروني

هِنّي لْ كَـبّروني

حَلماتِك. إسئِيُن

زَهْرِن وِجّي فيُن

حَبحِبُن

إِشرَبُن

وما إرْتِوي، عِطشان،

لِلْ عَضِم عِطشان

وحاسِس إنّي بُور؟

نَـبّوعتي! مَحرور!

مَحرورِك، دِسّيني

بْ جسمِك! أنا وِلعان

وِلعانِك. طَفّيني

عْطيني لْ حَـبّتـَين

دَخيلُن. ناميلي

عَ الصوفا. تْلِجيلي

نِفنافِك، بياضِك!

أنا طَفّول فْخاضِك!

تْلِجي التَلجتَين

تَلْ إنوسي تْفِحّ

وأنا كَمّش. غِطّيني

بَيناتُن، بْصِحّ!

يَ إنتي صِحّيني.

* * *

La bien – aimée

زَنبئتَك عِطشِت. وَنْ صِرت؟

بْعَتلي لَـنّو شي نَسمي

إنّك رَح تِرجَعلي، كْبِرت

سنتَين، وبَعدو جِسمي

"عَ إمّو". وَلا مَرّا دِرْت

وِجّي لْ غَيرك. ولا بَسمي

فَلتِت منّي. وْلا تْعوكَرت

بْ تِطليعا. يَ بْ شي كِلمي.

عينَييّ كلُّن نَطرا

بَعدَك فايِء عَ إسمي؟

يَمّا عَ رْفوف لْ غَبرا

نْسيتو. نْ كان بَعدو بْ ئَلبك

ناطرتَك. جِبلي لْ بِكرا

وأنا عِندي إني بحبّك.

* * *

يونا la dilecta

I

غْـنِجي! مِش ئْبال

لِ مْرايي. بْ عينَييّ

السُود. نْئَحي عْلَييّ

لْ ما خَطَر عَبال

لْ ما رْتَخا زِنّارا...

ولِم شالِت الشَّال

عن شَعرا وزَتِّـتو

بْ غَنجي! عن شِبّاك

التَعا "والشّو باك؟"

مِش إِيدي،

لْ ئَصيدي

لَمِّتو

باسِتو

وخِلئِت لْ ئَصيدي

مِش وَرَء وكِلمات

ومَئاطِع طْوال.

لْئييّ مْنِ لْئِيّات

لْ إنوسي- لْ جَمال.

II

غَطِغْطيني بِلْ

إِنوسي، وئَطِّرا –

عَ بْحبِّك- زَهِّرا

عَلْ وَرَء، ويْهِلّ

هَلْ مَرّا صِدرِك.

نَئاوِة صِدرِك

مِن وَرا التِرغال

ونِركَع لِلْ جَمال.

...

يِشرُد ئَلبي بِلّ

الريشي بْ جِسمِك، شيلِك

مِن تَحت لْ هَمزي

لاّء: مِش بْ غَمزي

بْتـِتمَلَّئي. وشيلِك

شَيلِة لْ غَرشِكل

يا لْئيّتي! ولا مِتل

رَح يمكن يِنْشال.

والنُوتا تْغنّيلِك

allegro، نْدَردِرا

بْ زاكرِة لْ ئْلـال.

وشيلِك بائِة مَرا

نَئحا إيلـاهيي

بْ لِغّا لِبنانييّ

سوناتا لْ جَمال.

* * *

DUO

م: شوفي لْ ئَمر بَرّا

كيف مارِء عَلْ ئَرميد!

ي: شِفتو.

م: عَم يلـالي

ي: لْ ئَمر؟

م: وفِسطانِك

ي: إى. وينَك؟

م: مِش بْعيد

يِئبرني لْ بيلـالي

أنا شِمّو لْ فِسطانِك

مِتلـان!

ي: وأنا...

م: شو بِها لْ أنا؟

ي: عَبالي...

م: شو؟

ي: بِستِحي

م: شو؟

ي: ...

م: إجيلِك؟

ي: إى.

م: "وِحبِّك"؟

ي: إى، إى.

م: عَبالِك نِتعَرّا؟

ي: عَلْ هَوا؟

م: وإتْمَرّا

بْ زلطِك عيد

عْيوني، كاس نْبيد

لْ لّيلي، لْ غَمرا... جايي

ي: لْ حبَّك رح تْفِرّ

عن داير فِسطاني

لْ عِمر عَم بيمرّ

جِسمَك عَم يرعاني

م: تْحَمَّميلي جايي

وغلَئي لْ بِردايي.

* * *

SOLO

خِدني، عْطيني إسمَك

نْزِرِع فييّ، جِسمَك

بْداري. حِطّ لْ أرْوَع.

دْفِئْلي. شو مِشتَئلَك

حِرجي... عَ بْيلْبَئلَك

يا غْمّورتي تِزرَع.

طَمِّشني، كَمْكِرني

بِلْ حب، وغْمِرني

عَجْنِة حبّي بْتِطْلَع.

* * *

مِنسمِّيا يونا!

I

+: نام الصبيّ؟

-: نام

هَديل لْ حَمام

هَزهَزلو تَ يغفا.

+: وغِفي بْ ريحة إمّو.

-: لْ هَوا بَلّش يودفا

+: تَ يغمُر لْ إيّام

وأنا إغِمرلولو إمّو.

II

+: لَيكي لْ ئمَر زَهَّر

وكسَر عَتم لْ لَيل

-: لْ لّيلي عبالي عبالي إسهَر

=: عن ملعني حنوني

+: بَرّا؟

-: عَ إيدَيك

ئصّرلَك لْ لّيل

أنا وعَم إتزّكر

كيف يوما عينَيك

صِدرفي لْتَئو فييّ.

+: لَحظا ما بنسيا.

ونَئاوِة لْ حَيا

تئلّي هَيدي هييّ

يا ئَلبي نَئّيا...

III

-: لْ ئَمَر نائَع عَ التخت

+: وروبِك نئَح عْلَييّ

تْعَي تَ نجبلو إخت

تعيّطلو يا خَييّ

-: لْ لّيلي؟

+: عبالِك؟

-: إى.

+: تِئبريني هَلْ إى.

لْ خَجولي... كرمالِك.

زادو كلمِة لاء

تَ تئوليا بْ غنجي

(وشو حَنوني لْ غنجي)

لما الشهوي تنّء!

بْ جِسمي أنا تنّء

وإنتي عبالِك.

IV

-: لْ لّيلي غِفي بكير

+: عَ صوتِك!

-: يئبرني

ئَلّي تَ غنّيلو

+: كَ أنّك ئلتيلو:

مَحروء وناطرني

لّي بتشبهو نام

يا سهرتي، نام

روبِك لْ حَرير

بيلـالي كتير

ومشتهي يغمرني

بَيّك

...

+: فرِشيلي

لْ مَرا لْ إم

-: عْطيني

أزغَر خْدَيدييّ

+: لْ بَيضا؟

-: السماوييّ

+:

"لَ سِرّك" ... عَلّيلي

تَ حِطّا... فْتَحيلي

حِرجِك.

-: ئُوم طْفيلي

لْ لّمبا لّي بِ عيوني

+: ريتُن يئبروني

عينَيكي، يا عيوني

...

دخلِك! فلِتيلي

التنهيدي لْ حَنوني

كِلّا... ورجفيلي.

V

-: شو منسمّيا؟

+: إزا عينَيا

زِرء لَ عينَين

إمّا- وإمّي- يونا

-: مش أحلـاين يونا؟

+: وريتُن يئبرونا

مَرّا ومرّتين

من هَلّء عيونا.

* * *

أنا مريضيك... صِحّيني

SOLO

طَعمة جِسمي بُور

يَنْ يَنيونا، تَعي

حِطّي جِسمِك مَعي...

شُوفي إزا مَحرور.

بْ خدودِك دِسّيني

بْ تِمِّك. أنا وِلعان

وِلعانِك، طَفّيني

عْطيني لْ حَبّتين

لْ إنوسي، لْ حنان

تْلِجي التَلجتَين

أوِّل تَلجتَين...

خَلّي لْ حَيا يفحّ!

وأنا شِمّو. غِطّيني.

بَيناتُن. بْصّح

يَ إنتي صِحّيني.

* * *

فْتَحيلو

DUO

ي: وَن وينَك؟

م: عَ الدَرب

جايي.

ي: أيّا دَرب؟

م: لْ بِتوَصّلني لْ عِندِك

يا عِندي: شو بِكي؟

ي: أَفكاري مْشَربَكي

فيك. تْعا!

م: شو بَدِّك؟

ي: تجيني وتِتّكي،

تْفِكّلي

تحكّلي

غيابَك...

م: شو بتحبّي

جبلِك؟

ي: ئَلبَك.

م: ئَلبي

سَبَئْني لَ عندِك.

فْتَحيلو

فْرِشيلو

ريحة شَعرِك، زِندِك

ي: تئِبرني...

م: وغَر هَيك؟

ي: تِطليعة عينَيك

بْ صِدري...

م: أنا إركَعلو

صَلّيلو، شَعشِعلو

عينييّ... ضَوّيلو

شمعا عَسَلييّ

كاغِيلو...

غَر هيك؟

ي: غَمرا لَيلَوِييّ

طَويلي!

م: وغَر هيك؟

ي: وجِبلي: مش تغّل

تحت تيابي، تبلّ!

ئَلبك جِسمك فييّ.

م: وغَر هَيك؟

ي: ئلبَك ئبل إيدَيك

وكلّك: إنّو تضل:

وعيونَك عَلييّ.

* * *

مْلَوفكجي

مِسّاج نْبَعت بِلْ لّيل

DUO

م: أنا هْبوب لْ هَوا

عَ داير فِسطانِك..

لْ ئَطفي من نيسانِك...

ي: أنا وإنتي سَوا

مَنّا أحلـا من:

"أنا هْبوب لْ هَوا؟"

م: مْبَلـا، عَم تْعِن

عَبالي من وَئت

لْ وَئت...

وكِل مَ شْتَئت

(مئاطعا)

ي: أُوعا تكون مْحيتا

وراحت مع لْ هَوا.

م: نْسيتا.

ي: كيف ئْدِرت

تِنْسيا، وَن صِرت؟

+: بَعدني كِل مَ

فُوء عْليكي... (بتئاطعو)

-: عْلَييّ! أيّا مَ؟

+: بِسئَل...

-: تَ تسئَل؟

+: شو صار فيكي؟

-: كنت مْفَكّرتَك إنت

بَيّ الصبي وِلْ بنت.

إنّي أنا هَمّك

+:؟

-: إنّي أن هَمَّك!

+:؟

-:

+: إنّك نِعمتي

وبعَدا طَعمتي

بْ ئَلبَك مش بْ تِمّك...

؟

أنا لْ بَيتوتييّ

وفييّ ريحِة إمِّك.

+:؟

- كيف تَ فِئت عْلَييّ؟

+: لِ أنّي شْتَئتلِّك

حابِب شوفِك...

-: سَكِّر...

نْسيتي.

+: أنا عَم فَكّر

نِلتَئا، تَ ئِلِّك...

-: وأنا بْئلّك سَكِّر.

* * *

تَ تصلّيلُن أكتر

ي: ما شفت بْ عينييّ

إنّي مشتهييّ

(تاخدلُن صُورا تْنَين)

م: وتلْـالي

ي: بْ عَدَسْتَين

عيونَك. وتظهّرُن

عَلْ ورَء أَشعار

بْ حِبر لَون النار.

م: عَم فَكِّر إِندِرُن

لْ سَيّدة لْ بَياض

دخيلو لْ بَياض

لِم ينئَح النَئا

ما بئا تِتهموه

بالدنَس، وتْخَطّوه

إنّو "فِخّ الشيطان"

رح- كفّة لْ ميزان

تطبُش صَوب الشئا.

* * *

صَلـا لْ ألف التالت

مشتهي إصمدِك

بْ تَبرنَكل ئَلبي.

صَلّيلِك، عَدعدِك.

ضَوّي شمعِة حبّي.

وإِركَعلِك، إعبَدِك:

ضِبّني ونْضبّي

بِلْ حب.. وبُوعدِك

إنّي مش رح خَبّي

عَليكي، وعَربدِك.

إلِك وحدِك عِبّي.

شْردِيني وإشردِك،

مش بل حَبي وحَبّي

يا نبيدي، عنئدِك

كِلِّك سَوا، نْكبّي

عَ غِمري، ونَئودِك.

نئدي شو بتنحبّي:

(نْ شوّبتي بَوردِك)

نئدي فْتحي- ضِبّي.

وإِتناوَل بْهَلْ لّيل

بَياضِك عَلْ لّيل

ويباركني رَبّي.

* * *

ناميني

DUO

م: يونا، أنا يَنْيونـِك

ي: أنا ئَلبَك

م: مَجنونـِك

ي: ينيونتَك

م: دُوبيني

ي: حنّونْتَك

م: حِنّيني.

ي: صِدريتك

م: طفّولِك!

ي: تنّورتَك

م: غلغولِك

ي: غَمْغِرني

عَشعِشَّك

ناميني.

* * *

طريق الحريّي

أوّل صوت- إنت لّي بْيندهوك من خَلف مْواج الليل، من الدموع المالحا،

والبكي بَلا دموع، من الوقفي المسقعا خلف البواب السميكي.

تاني صوت- البواب المش رح يفتحو إلآّ بعاصفي جايي من صوب البيوت

الواطي.

الجوئا - ولادنا مشرّدين عَ طريق كْفَرغِربي، الغُربا واللاجئين عم

يخلّفو ببيوتنا... وينك؟ تْعا.

أول صوت - أرض الجدود والبيّات عم تنباع، أرض الوطن عم تنسَحب من

تحت جْرينا.

الجوئا - وينك؟ تْعا.

تالت صوت- شْوارعنا نْتلو ناس ما بيشبهونا. دعسات الغُربا واللاجئين

عم يمحولنا خْيالنا... غاباتنا عم يفضو من الفصول. سجر

البيّات قصّوه زيني للعيد، السجر العتيق شعّلناه تَ ندفا. ولّي

بِئيو حرقووُن الغُربا لّي ما عربشو عَ السجر لمّن كانو

ولاد... ملامحنا عم تنمحا، لبنان رح يصير فصل واحد.

تاني صوت- كان بدّي تشوفنا حدّ النار وبردانين.

الجوئا - وبكرا مش رح يضلّ عنّا سجر نقصّو ت ندفا. وينك؟ تْعا...

الإبن - لَوين رايحين يا بيّي؟

البَيّ - رايحين ع الحرييّ يا إبني.

الإبن - بعدا بعيدي يا بَيّي؟

البَيّ - مش كتير يا إبني.

الإبن - يعني بس نوصَل بتخلص الطريق ومنرتاح من المشي؟

البَي - كل الطرئات بيخلصو ما عدا هالطريق يا إبني.

أول صوت - إنت لّي بتنام آخر واحد،

تاني صوت- وبتوعا قبل نجمة الصبح تَ الشمس تشُرق عَ الكل.

الجوئا - ليلنا ما كان يعرف يخلَص! الأطفال عم يسألو ليش الصبح

تئخّر؟

تالت صوت- يلّي بْيعرف قَتَلوه حتّا ما يقول ليش صار هَيك؟ الإمّات ما

عندُن إلاّ لقمة الحنان يطعموَا للولاد. حتّا رغيفنا مملّح بْ

مِلح النطرا.

أول صوت - الأطفال عم يكبرو مئخّرين... وينك؟ تْعا.

الإبن - وين صارت الحريّي؟ بعدا بعيدي يا بَيّي؟

البَيّ - إى، بعيدي، بَس مش كتير يا بَيّي.

الإبن - ئدّيش؟ ئدّ لّي مشيناهن مبارح واليوم؟

البَيّ - ئَدُّن وأكتر نتفي. تعبت من المشي؟

الإبن - مشينا كتير اليوم... رح تغيب الشمس... وين خَيّي الزغير؟

البَيّ - قتلوه المحتلّين.

الإبن - وين إختي؟

البَيّ - قتلوَا اللاجئين وزتّوَا بالحِرش.

الإبن - ليش قتلوَا؟

البَيّ - لأنّا حلوي!

الإبن - وين خَيّ الكبير؟

الإبن - عَم يئود المعركي العاشرا.

أول صوت- إنت، لّي بَس نِغلط بتقلّنا سْكتو، وما منزعل، لأن ما بتخبّي

علينا شي.

تاني صوت- وبَس نكزب بتصرخ بوجّنا: الكزب نِص الخياني، وهالمرّا

كمان ما منزعل، لأن من البدايي عَطيتنا وجَّك كلّو.

تالت صوت- وبَس نْظنّ بتجئِرنا جَئرة القايد والبَيّ، لّي إزا ضرب بينوجع.

الجوئا - الجباني صارت خبز الأسياد. يلّي راحو لَ عند ملوك الأرض

تَ يحكو بْ إسمنا، وصلو بلا جبين ورِجعو بلا وِجّ. وينك؟

تْعا.

أول صوت- حية جبل صهيون عَقصتنا مبارح وبكرا. مَلك الشام بعدو

حاطط عينو عَ الوطن الزغير. الكيان عم يتخزّق، العَرش عم

يهزّ. وينك؟ تْعا.

الإبن - بعدا الحريّي بعيدي يا بَيّي؟

البَيّ - وصِلنا يا بَيّي.

الإبن - لَيش بعدنا عم نمشي؟

البَيّ - الحريّي متل النار: تَ تضل شاعلي بَدّا حطب. وكل ما نقصّ

سَجرا كبيري بَدنا نزرع غيرا تَ تكبرمع لْعَم يكبرو، ويضلّ

عنّا كبار.

بيّاتنا ورّتونا النار شاعلي، ما بدّنا نوَرّت ولادنا رماد بارد...

وبَس تكون شاعلي ما حدا بيسترجي يئرّب عَليا ويطفيا.

الإبن - مين لّي بدّو يطفيا؟

البَيّ - المحرومين من الحريّي.

الإبن - تخمين ما في حريّي لَ كل الناس؟

البَيّ - مْبلا يا بَيّي، كل طفل بيخلَق بتخلَق حرّيتو معو. بًس الحريّي إلا

تمن يا بَيّي. هيئتك تعبت؟

الإبن - إى، يا بَيّي تعبت، بعدا الطريق طويلي؟

البَيّ - إى، يا بَيّي، بَس مش كتير.

الإبن - غابت الشمس، وين رح ننام الليلي؟

البَيّ - عَ طريق الحريّي.