ابو هموم: حقيبة مدهنة مش سيادية!

احضر ابو هموم ركوة القهوة المرّة، صب القهوة، وقال: "بعرف بتحب القشوة، تفضل". وناولني الفنجان وقال: "من الاول انت معي انو الوزارات السيادية يللي طحلونا فيا بالإعلام هي الوزارات المدهنة يللي فيها مص إصبع متل ما بيقولو. يعني اذا ما في استفادة وتقديم خدمات سامحونا ما بدنا. شو قولك؟". رشفت قهوتي وقلت: "يا ابو هموم كل وزير بالحكومة، شو ما كانت الحقيبة، المفروض تكون سيادية كونها مش لمص الاصبع بل من اجل خدمة المواطن الناطر من سنين تسهيل اموره الحياتية، والذي أكتافه ستنكسر من كثرة ما حمل من هموم على مدى سنوات تقاسم قالب الجبنة. منشان هيك يا ابو هموم يا بدنا نغير يا بدنا نرجع نكون "عتّالة" نحمل عن جديد "قرطة" جوعانة همها الشفط واللهط. عرفت كيف؟". أشعل ابو هموم سيجارته وقال: "بتعرف؟ خلينا ننطر لنشوف شو بدو يصير". وتابع: "شيلنا من قصة الحكومة، وخبرني شو قولك بزلزال الخواجه ترامب؟ يا زلمي على أساس كان رئيس لجنة انتخاب ملكة جمال الكون، كيف هيك خبط لزق صار رئيس اكبر دولة بالعالم؟ بعدين الزلمي مش انو جيغولو وبس، نسونجي ومزواج والسيدة الاولى يعني بتحط كيم بنت كاردشيان بعروة البلوزة تبعها. شو قولك؟ ليك يا ابو هموم متل ما شايف كل يلي قالو ترامب قبل ما يصير رئيس مسحو اول ما طلع، ومتل ما بتعرف خينا ترامب كان يحب التمثيل وشارك بكذا فيلم ومسلسل، حتى لعب ادوار بحلبات المصارعة الحرة. يعني هو ممثل ناجح لعب دوره بمهارة وقدر يوصل، والعالم اليوم ناطر عهد ترامب. واضح ابو هموم؟". تململ ابو هموم وعلا صوته: "بس يا أستاذ بلشت المظاهرات ضدو، وما بتعرف يمكن يبلشوا الأميركان يحرقوا دواليب ويقطعوا طريق مطار جي. اف. كينيدي، وشيعة ديربورن بولاية ديترويت يقطعوا طريق المطار ويعتصموا، وبينزل وفد ويقفل الطريق امام ترامب تاور بنيويورك، ومظاهرات حاشدة امام السفارة الروسية والقنصليات الروسية في مختلف الولايات الأميركية. شو بتقول رح يبلش الربيع الاميركاني؟". ضحكت من القلب رغم عبوس ابو هموم وقلت له: "هيدي أميركا يا صديقي، وهونيك السياسة لخدمة الناس. وعلى فوقه، ما عندن وزارات سيادية؟".