ميّ كساب عن رثاء السعدني لطليقته: "درس لكل راجل بتغرّه الدنيا"

علّقت الفنانة مي كساب على رثاء الفنان أحمد السعدني، لطليقته وأم أبنائه، التي وافتها المنية، خلال الساعات الماضية، على إثر إصابتها بأزمة قلبية مفاجئة أودت بحياتها.

وكتبت الفنانة مي كساب عبر حسابها الشخصي على "تويتر": "أحمد السعدني النهاردة أدّى درس للإنسانية... درس لكل راجل الدنيا بتغرّه وبتنسّيه دوره في الحياة".

ووجّهت كساب رسالة للسعدني، قائلة: "يا أحمد اعترافك بغلطك شجاعة كبيرة منك ورجولة... ربنا يخليك لأولادك ويصبركم على فراقها".

وكان السعدني قد نشر رسالة عن طليقته قال فيها: "ماتت في لحظة كانت بتكلمني قبلها بساعة ومكنتش عيانة كان عندها ضغط زي أغلب الشعب المصري... الحمد لله... ماتت ومشيت وقرّرت تسيبني للأبد. كنت فاكرها هتستناني ومتأكد من ده. مستحيل تحب حد غيري. مجاش في بالي إنها ممكن تموت دلوقتي صغيرة. وأكتر واحدة في حياتي شفتها بتحب الحياة وعندها طاقة إيجابية، ماتت وسابتلي الولدين والندم".

"أنا متأكد إنك في الجنة رحتي للي خلقك يوم عرفة وأميرة وست البنات والستات ونضيفة وكريمة وصنتي ولادي وبيتي... بحبك يا أمل حياتي اللي اتهد وبوعدك المرة دي هشيل المسؤولية، للأسف اتعلمت الدرس بس بعد ما اتحرمت من حنيتك وحضنك وولادك كمان اتحرموا من أحن أم. ربنا يقدرني وأربيهم أحسن ما كنت عايزة... بحبك ومش بطلب منك غير إنك تسامحيني... ربنا يرحمك ويرحمني ويرحم ولادنا يا حبيبة عمري الوحيدة".