ماذا قصدت نجوى كرم بالقول: "لا لزيادة حقوق المرأة عن حدّها"؟

في مقابلة أجرتها الفنانة #نجوى_كرم خلال مشاركتها في برنامج "على شطّ بحر الهوى" ("أم بي سي")، تطرّقت إلى موضوع المرأة ودورها في المجتمع، وصرّحت بأنّها ضدّ المبالغة في المطالبة بحقوق المرأة التي عليها تأدية دورها بأكمله كأمّ وزوجة من دون الانتقاص من أنوثتها، وأضافت: "ما بحبّ حقوق المرأة تزيد عن حدّها، عم نصير بخطر. وما بحبّ رجولية الرّجل تقلّ عن حدّها، منصير بخطر. أنا بخاف يصير الرّجال بالآخر يقوم يسهر عالأولاد باللّيل والمرأة تيجي تقلّو أنا تعبانة اليوم قوم إنت عمول حليب للولد، والصّبح يقلّها شو طابختيلنا بتقلّو أنا مش قادرة اليوم، عندي شغل. حبّذا لو كانت السّت بتعمل كل يللي لازم تعملو ببيتها وإذا كانت قادرة تشتغل لتسند جوزها إذا كان هوّي بحاجة، مش لتقول بدّي عبّي وقتي. أنا ضدّ إنو المرأة تقول بدّي عبّي وقتي أو حتى ما إضجر. شغلك كَإمرأة مش ممكن تضجري فيه. بدّك تنضّفي بدّك تطبخي، مش اتديري أعمال الخدم والسّواق. إذا كانت إمكانيات زوجك وإنت قادرة تعيشي عيشة معيّنة أنا بفضّل تكوني إنتِ بقمّة أنوثتك وجمالك قدّام مشروع هالحياة لمّا إنتِ تجوّزتي لتقدري تربّي جيل صالح ما تتركيه للخدم وأنا بعتذر من كلّ السّتات يللي بيعترضوا عَ رأي"، مما أدّى إلى انقسام الرأي العام على مواقع التّواصل الاجتماعي بين مؤيّد لهذا الرأي في اعتبار أنّ كرم تُعزّز أهمية دور المرأة كأم وزوجة، ومعارض للحدّ من أهميتها على الصعيدين العملي والاجتماعي، فردّت كرم موضحة وجهة نظرها بالتغريد عبر "تويتر": "بدنا نفرّق بين حقّ المرأة الإجتماعي، وبين دورها بالحياة

هي عامود فقري لتأسيس عيلة عظيمة
وعينا عٓ إنّو البيت هوِّ إمّ
المدرسة هي إمّ
ووراء كلّ رجل عظيم امرأة
مش يضيع التّوازن ويصير شغلها لتعبايِة فراغ
منّي ضدّ تحقيق وجودها ونجاحها طالما عارفة واجباتها وأهمّية دورها بتأسيس عيلة
هَيْدي السّت يلّي بشوفها بعيد الأمّ عم تتكرّم، لأنها بتهزّ سرير ولدها بإيد وبتهزّ عرش الكون بإيد تانية
وعي، ثقافة، حنّية، أمّ، أخت، زوجة، حبيبة ومدرسة الأجيال
ما ننسى هَوْدي الصّفات أو صرنا عم نحكي عن حدا تاني
هيدا رأيي".