حال الدّني

لمّا ربنا وجدها لهالدّني، 

وحجر عَ حجر حيطانها بِنِي،

كلّ البشر خلقوا بِقُدرِة قدير،

و ما تفرّقوا بين فقير وغني.

لولا وجود الفقر والتّعتير،

ما بان العزّ والعيش الهني،

ولولا وجود هالعبد الأجير،

ما كانت كل هالقصور بتنبِني،

ولولا وجود مجهول المصير،

اللّي ابتدا بالشّغل من عمر الولدني،

ما كان ٱرتاح إبن الوزير،

وما كان تكبّر ع عرش الميْدَني،

 لولا وجود الفلّاح القدير،

ما كان حدا بهالأرض بيعتني،

ولولا وجود الملك والمير،

ما كان ٱنباع الثّمر المِنْجِني،

و لولا وجود الذّهب والمال الكثير،

ما ٱزدهر وطنّا سنة ورا سنة،

ما كان توظّف اللّي وضعو عسير،

ولا ٱبتدا شويّة شويّة يغتني،

ولهيك تعيير البشر ما بصير،

ما بعمرو هالمال كوّن بَني،

ولولا الغني ما عاش الفقير،

ولولا الفقير ما عاش الغني.