رسالة من القلب للقلب

8 آذار هوّي اليوم العالمي للمرأة. بغتنم ها المناسبة تـ قول صباح الخير لَـ كلّ أمّ. وأنا أمّ. لَـ كلّ امرأة عاملة بالبيت وبرّا البيت. وأنا امرأة عاملة. لَـ كلّ امرأة عم تكافح كرمال حياة أفضل إلها ولعيلتها. لَـ كلّ صبيّة عم تفتّش ع مستقبل أفضل إلها بلبنان، تَـ تكون حقوقها منصانة.
مصيركن بإيديكن. مش بإيد حدا غيركن. بتقدروا تصنعوا ها المصير ابتداءً من هلّق. اليوم مش بكرا.
المسألة كتير بسيطة. الانتخابات عَ الأبواب. أكانت بِـ وقتها أو مع شوية تأجيل "تقني". ما في أيّ سبب، ما في أيّ حجة، ما في أيّ "قوّة"، ممكن تمنعكن عن إحداث معجزة بـِ الانتخابات. نعم، معجزة. إنتو إللي ما حدا حاسبلكن حساب "عن جدّ"، لازم تكون ها الانتخابات بالذات هيّي الحساب الحقيقي، وهيّي المناسبة للإمساك بمصيركن، وللمساهمة بصون مصير البلد ومصير ولادكن.
هيدي مسؤوليتكن. مش لازم ولا امرأة، شو ما كان وضعها الشخصي، أو العائلي، أو الاجتماعي، تمتنع عن تحمّل ها المسؤولية.
بيوم الانتخاب، في برداية. ورا البرداية في صندوق. ما حدا رح يكون معكن وقت بتكونوا قدّام ها الصندوق. فيكن تاخدوا القرار اللي بدكن ياه. ولا "قوّة" بتقدر تنتزع منكن ها الحق.
بأغلب الأحيان، بينقال بسخرية وباستخفاف، إنّو المرأة ببلادنا بتمشي متل ما بيقولولا بِـ البيت. يعني ما عندها شخصية، ولا موقف، ولا قرار. ها الشي هوّي إهانة لشخص المرأة، للأمّ، للزوجة، للأخت، للبنت، للعاملة، للموظفة، للدكتورة، للمديرة، للمعلّمة، وكمان للعاطلة عن العمل.
هيدا هوّي الموعد تَـ تكونوا "عن حقّ وحقيق" نصّ المجتمع، ونصّ البلد.
ما تخافوا من حدا. ما تتأثّروا برأي حدا. شوفو شو هيّي مصلحتكن ومصلحة أولادكن ومصلحة بلدكن. عندكن ذكاء كافي. عندكن معرفة كافية. عندكن وعي كافي. عندك تجربة كافية. تـَ تاخدوا القرار الأنسب للتغيير.
الطبقة السياسية، وخصوصي الأطراف اللي عندهن "تاريخ" طويل من الفساد، إنتو بتتحمّلوا جزء كبير من مسؤولية استمرارهن بالسلطة. البلد عم ينهار. الشباب عم يهاجروا. اليأس ضارب أطنابو وين ما كان. الناس كفروا بالوضع. وما بقا يصدّقوا إنّو الأمل بالتغيير ممكن. ما في حدا مبسوط ومرتاح ع وضعو، إلاّ الحرامي، واللي مظبّط حالو "عَ الطريقة اللبنانية".
8 آذار هوّي يومكن. هوّي يومنا. بخاطبك إنتي، أيتها المرأة اللبنانية، وبطلب منِّك تتحضّري للانتخابات. واجبِك تترشّحي. واجبِك تعرفي لَـ مين تصوّتي. واجبِك تكوني حرّة وصاحبة قرار. هيك بتشاركي بحلم التغيير. كلّ سني وإنتي بخير.

[email protected]
Twitter: @joumana333