اشترِك في نشرتنا الإخبارية
بعد فكرة التجحيش الجهنمية في المسلسل المستمر من هلق لتخلص الدني، تبرز الأفكار اللامعة في بعض الدراما المشتركة المرتكزة على بعض الأفلام الأميركية العتيقة، المتميزة بالمصادفات العجيبة، قررت عن سابق تصور وتصميم اقتحام الدراما العربية المشتركة مع رواية "واقعية" تحمل عنوان "مين البابا؟". المشهد الاول بنت وامها. البنت: "ماما شو بك زعلانة؟" الماما بتنهد: "يا مامي انت عارفة انو ابوك مات و..." هنا تقاطعها الابنة: "هيدي قصة قديمة، وبعد ما مات البابا تجوزت عمو سامي، شو في مام شغلتيلي بالي؟". الوالدة تترقرق دمعتها وتقول: "مامي انا لليوم مش عارفة - صمت ثقيل - اذا يللي مات كان ابوك يما اخوه التوأم (موسيقى مرعبة مع طبول وأورغ). الابنة مندهشة: "خيو التوم؟ وما حدا كان عارف؟" الوالدة تقول بصوت متهدج: بس ابوك واخوه (لهجة مصرية). تشهق الابنة صارخة: "يعني انت متجوزة تلاتة؟ (لهجة سورية) وتتابع: "وما حدا من الحارة كان عارف؟" الوالدة: "ما حدش كان عارف غير ابوك واخوه" (لهجة مصرية). صراخ الابنة يعلو وهي تلطم "وليه على قامتي، طيب هلق انا بنت مين؟ (لهجة بيضا) يعني هلق اخي هوي اخي او ابن عمي واختي هيي اختي يما بنت عم اخي (لهجة حلبية للتغيير). موسيقى من وحي أفلام دراكولا... هنا يدخل الابن واخته. الابن: "البابا جوزك سامي مش هيك؟ (لهجة فرنكوفونية). الوالدة تشطف الارض بدموعها وتقول: "مامي قبل ما اخد ابوك كنت خاطبة اخوه". الابنة الثانية تصرخ: "انا عاوزة اعرف مين ابويا" (لهجة مصرية صعيدية)... الأخوة التلاتة سوا مع سمفونية عويل مشتركة مصرية لبنانية وسورية: "انت ماما بس مين البابا؟". تجميد الصورة، صوت المذيعة: لتعرفوا مين البابا تابعونا برمضان سنة الجايي وكل سنة وانتو طيبين.
