مرحبا سمير قصير: منكمِّل بالّلي بقْيو

2 حزيران 2005. كانت الساعة شي تسعة وكم دقيقة الصبح. مش ممكن إنسى هيداك النهار. ولا هيداك الوقت.

من يومها، تغيّر كلّ شي. متل كلّ إلّلي عرفو، عرفت إنّو الحلم تَمَنو غالي، وإنّو بلّشت المدبحة الّلي ما حدا كان قادر يعرف لوين بتوصل.
بحبّ خبِّر الجميع إنّو، قبل بيوم، إجا سمير عا الجريدة. كانت شي الساعة 2 بعد الضهر. كان حامل جاكيتّو الصيفية عا ضهرو، وعم يضحك. متل شي نجمة كان عم يضحك.
ضِحِكْتو خلّتني أشعر بنقزة. والله العظيم، عم إحكي عن جدّ. شفت متل شي إكليل نور حول راسو. قلت بنفسي: يا ربّ أستر!
2 حزيران الصبح. بتذكّر إنّو تلفنلي محمد علي الأتاسي. وكنت عم أبكي. سألني، بصوت عم يرجف. جاوبتو: قَتَلو سمير قصير.
بعدين، بتعرفو الحكاية، من أوّلها لآخرها.
***
يا حبيب قلبي يا سمير،
ما بدّي كتِّر حكي عليك، ولا عَ القرّاء، ولا بدّي بيع عواطف. رح قول للجميع كلمة واحدة، نقلاً عن غربة بنت مدلج بمسرحية "جبال الصوّان": كــْتـــــــــــار قـــْـــــــــلال مـِنـْـكـَـمـِّـل بــالـلـِّي بـِقــْيـُو.
منشان ها الشي، بنقل مقطع من المسرحية عَ لسان حنّة الساحلانية:
سـِنـِة... اتـْـنـَيـْن... تـْلاتِــــة... مـَرَقــُو عَ مـَـــوْت مِدْلـِج
أرْبعة... خمـْسِة... سـِتّ سـْنين مـَرَقــُو عَ مـَوْت مِدْلـِج
سبعة... تمـانـي... تـِسـْعـَة... عشـْـــــرة
وْفـاتـِك المتـْسـَلـِّط محتلّ جـْبــال الصوَّان
وْأنـــا عـَمْ خـَتـْيـــــِر ســِنـِة عن ســـِنـِة
كمان رح انقل جواب الأهـالي:
ناس نِسـْيـُو... وناس عـَمْ يـِنـْسـُو... وْناس ما نـِسـْيـُو
وْصـُورِة مدْلـِج عـِتـْقـِت
وْبـَعـْدا مـْعـَلــَّقـة عَ كـَم حـَيْط ببـْيوت نســـوان لابسين أسـْوَد
وجواب حنّة:
أنا حنـِّة السـَّـاحـْلانيـِّة وْصـُورِة مـدْلـِج قاعـْدِة عنـْدي عَ الحـَيْــط
أنا بـَعـْرِفـُــن كـِلــُّـــن...
ثم صرخة غربة، بنت مدلج، الّلي مات وهوّي عم يحرس البوّابة:
لا تــْـخــــــــــــافـُــــــو مــافي حـْـبـُوس تـْسـاع كلّ النـَّاس
بـْـيـِـعـْـتـِقــْـلـُـو كـْـتـِيـْـر
بـْـيـِـبــْـقى كـْـتـِيـْــــــــر وْ باللـِّي بْـيـِـبـْقــُـو رَح مـِنـْـكـَـمـّـِل
غـَـمـَـر الطــُّـوفـــان الأرض وْرَجـَّـعـُوهـا اللـِّي بـِقـْـيــُو
هـَدَمـِت الـِـحـْـرُوب المــُــدُن وْحَـرَّرُوهـا اللـِّي بـِقــْـيـُــو
اسـْتـَعـْبـَدو الظـُّـــلاّم النـَّـاس حَـرَّرُوهــُن اللـِّي بـِقــْـيـُــو
بـَـدْنــا نـْـكـَـمـِّـل الـْمـِشــْـوار
قــــْــــــلال... يـْــكـُــــــــون مـِنـْـكـَـمـِّـل باللـِّي بـِقــْـيـُــو

الجميع:

بـَدْنـا نـْكمـِّل باللـِّي بـِقــْيـُو بـَدْنـا نـْكـَمـِّل باللـِّي بـِقــْيـُو
كتـار قـلال يْكـون شو هـَـمّ مـِنـْـكـَـمـِّـل مـِنـْكـَمـِّـل
باللـِّي بـِقــْيـُو باللـِّي بـِقــْيـُو بــالـلـِّــــــي بـِقــْــــــيـُـــــو
غربة: كــْتـــــــــــار قـــْـــــــــلال مـِنـْـكـَـمـِّـل بــالـلـِّي بـِقــْيـُو
الجميع: بـَدْنـا نـْكـَمـِّـل باللـِّي بـِقــْيـُو بـَدْنـا نـْكـَمـِّل باللـِّي بـِقــْيـُو
كتـار قـلال يْكـون شو هـَـمّ مـِنـْـكـَـمـِّـل مـِنـْكـَمـِّـل
باللـِّي بـِقــْيـُو باللـِّي بـِقــْيـُو بــالـلـِّــــــي بـِـقــْــــــيـُـــــو
غربة: كــْتـــــــــــار قـــْـــــــــلال مـِنـْـكـَـمـِّـل بــالـلـِّي بـِقــْيـُو

***
حبيب قلبي يا سمير، هيدا عهدي إلَك، وعهد كلّ الأحرار إلّلي بيشتغلو معنا بمهنة ثقافة الحرية: كــْتـــــــــــار قـــْـــــــــلال مـِنـْـكـَـمـِّـل بــالـلـِّي بـِقــْيـُو!