بيروت أمّ الدني

ما بعرف من بعد كل اللي انحكا أو كل اللي صار قديش بعد في حكي، بس الرسالة اليوم هي للشعب اللبناني. اليوم قبل بكرا لازم يتحاسبوا المسؤولين! ممنوع منعاً باتاً يهربوا من هالقصة! ما بقا فينا نتحمل يكون في مليون رفيق الحريري و ننطر 15،20،100 سنة ليتحاسبو الملاعين!

يمكن نحنا ما متنا أو ما انجرحنا أو ما خسرنا بيت، صديق، بي، إبن. بس الأكيد إنو قلبنا اتكسّر 10452 شقفة! بيروت ست الدنيا، بيروت السلام، بيروت النضال انخطفت بس ما ماتت! بيروت ما بتموت لأنو بكل بساطة في وراها شعبها وأهلها بدن ياها تبقى، وطالما حاطين براسنا إنو لبنان ما بينتهي ولا حدن بيقدر ينهيه لأنو بقلبنا وبذهننا موجودة قصة... قصة فلاح عمبيسقي، قصة بي عمبيتعب، قصة ولد عمبيضحك، قصة كرامة وشعب عنيد...

وهيدي القصص ما بتموت بتتوارث للأجيال اللي جايي.

فيكن تدمروا بيروت مية مرة بس لازم تتأكدو إنو رح ندعس عراسكن ونعمرها ألف مرة... بيروت أكبر من الأشخاص، أكبر من جغرافيا، أكبر من تاريخ... بيروت هي قلب الله.

إجا الرئيس الفرنسي، رئيس أقوى دولة بأوروبا وقال بشكل كتير واضح إنو نحنا اللي منكتب تاريخنا بإيدنا ما حدن بيقدر غيرنا.. لأنو قادرين بكل عزيمة وقوة نبني البلد اللي نحنا بدنا ياه.

نحنا منعرف تماماً إنو قبال كل نهاية في بداية... بس البداية اليوم مختلفة.

بتوجه لأخي "اللبناني" فقط لا غير وبقلك: صار الوقت يرجع يتعمر لبنان، صار الوقت تكسر الصمت اللي فيك، صار الوقت نتنفس حرية، صار الوقت ترجع بيروت ست الدنيا...

صار الوقت نتصرف... كلبنانيي.