هيك بيوصف المرا. وكأنو صاحبنا كامل العقل.
برحمة ضميرك أوعى شوي. هيدي المرا. ما رح قول صاحبتك ( لأنو كلنا بنعرف كيف متل الكلاب بنركض وراها. ولغاية مفهومة).
هيدي المرا. هيي إللي طعمتك من جسما حتى رق عظمها.
هيي إللي مسحت وسخك طول سنين. هيي إللي ما نامت ليالي لما كنت تعبان. أو ناسيها وبرات البيت سهران.
هيدي المرا كانت الأرض والسما ما سايعيتها لما كنت يا دوب تجمع كم حرف عا بعضها.
هيدي المرا هيي نفسها صار كلامها بلا طعمي لما كبرت يا ( بوشت) ونسيت مين عملك زلمي.
هيدي المرا. كانت ملجأك ومطعمك ومصرفك ومستشفاك
هيدي هيي اللي كانت تنسى نفسها بالدعاء من لهفتها عليك.
هيدي إللي بنص عقل. من عظمتها. الله جعل الجنة تحت إجريها وقلَّك كرّمها.
هيدي المرا. إللي خلت قلبك يعرف شو يعني حب. ونورت ( على زعمك) الدرب. شفت حالك وصرت تتمخطر متل الطاووس لما بلش بطنها ينتفخ. صرت زلمي. بسبب
هيدي المرا.
هيدي المرا لكانت بكل عيد تسابق الوقت لتعيدك. وأنت بالغلط تتذكر عيدها.
هيدا المرا سكتت عن إهاناتك. مش لضعفها. لا غلطان كتير. سكتت لبعد فهمها. وإنت لليوم بعدك ما فهمت.
هيدي المرا. لما حبتك. وهبت حالها ومالها وجمالها إلك. وأنت يا متغطرس شو قدمتلها. (كف عا تمك اذا بتجاوبيني). إسم الله عليك شو زلمي.
على أساس ( يا بعدي) انت زلمي وتاج الراس.
هيدي المرا شالتك بمرضك. تحملت إهمالك. وجلجأت أصحابك. وهمهمات أهلك لما تأخر حملها شوي (لأنو مصنع بيها تأخر بوضع المولود ببطنها). وهيي يوم إللي حضرتك بتبقى لقبل الفجر عم تلعب ورق مع أصحابك ناطريتك بالصالون لافي حرام عليها..).
لأن حضرتك وإبنك كبرتو من غذا هالروح والجسد. وبس حضرتك شاطر تتفلسف وتقول عنها:
بنص عقل.
اذا بنص عقل. وعم بتدير حياة أجيال. كيف لو كانت بعقل كامل.
وبما إنو مع كل هالحقايق. بالدلائل والثوابت. وحضرتك يا فاشل (جاهل) بظن صارت واضحة متل الشمس مين إللي بنص عقل.
أنا وعيت. وفهمت
وأنت شو بعدك ناطر؟