هوا

ما بعرف من وين بيجي اله

من جناح الفراشة

ولاّ من وراق الشجر

ولاّ من أمواج البحر

ولاّ من سهرات القمر

أو من كلام فيروز اللي بيقول:

"يا هوا يا هوا يا اللي طاير بالهوا

كنتوو كنا تضلوا عنا وإفترقنا شو بِنا"

كل يوم منسأل عن الضو

وعن الهوا وعن قصة الريح

ما فيها تعيش بيروت بلا ضو

ما هيي غليان الضو

وما فيها تعيش بلا هوا

ما هيي بتعرف معنى الحرية

في هوا متل الأمل

بيسكن بقلبك

وفجأة بتلاقيه صار شاب حدّك

وبتفرح فيه وبيفرح فيك

وفي هوا متل السر

بيسكّر ع حالو الباب

لا مين أخد ولا مين جاب

وفي هوا بينام ع إيدك

بيحط ع كتفك

بتغنيلو وبيغنيلك

وما بتعود تعرف

إذا هو إنت أو إنت هو

وفي هوا

بيشد فيك متل الشراع

بيحكيلك عن العمر اللي ضاع

وما بيخلليك تطلع وراك

وبتنسى تسألو: لوين...

وفي هوا

بيبرم حولك وحواليك

بيفرّح قلبك وعينيك

وبتوعى ع حالك عم تقول :

"روح إسم الله عليك"

وفي هوا

بيمسكلك إيدك

بيمشطلك شعرك

وبيقلك روح الهوا معك

وبيعرف إنك بتوصل بكير

وإنك بتربح كتير

وما بتعرف مين ساعدك

وفي هوا

إسمو هوا الإيام

لا إلك فيه ولا إلو فيك

بتنطرو وبينطرك

بتعيشو متل المنام

وبتحتار إذا بتضل أو بتفلّ

وما بتعرف إذا بتخلص قبلو

أو بيخلص قبلك

وفي هوا

متل القصب بيغني

وبيذكرك باللي راحوا وبتحبن

وما بتعود تعرف حالك

إذا إنت القصب ولا الهوا ولا الغنية

شوي وبيبلعك الصوت

وبتعرف إنك إنت كل اللي راحوا وبتحبن