اشترِك في نشرتنا الإخبارية
كنّا صغار
ونقيس العمر بالشبر
ونعلّم بالقلم والخيط
خشبة الباب
وتقول ستّي: "كلّ شبر ب ندر"
ونزعل إذا ما كبرنا
ونرضى إذا طوّلنا
ونكبر نحنا وعم نلعب
ونغفى نحن وعم نتعب
يا ريت بقينا بزمن الطفولة
وما عرفنا إنّو العمر
ما بينتهي بالشّبر ولا بالندر
بينتهي مترين بمتر
***
كنّا صغار
ونخاف من العتمة والغول
والضبع وأبو كيس
كلّن راحوا وضلّ أبو كيس
غيّر شكلو وملامحو
لبس طقم وكرافات
سرق تعب العمر
وسهر الليالي
سرق القرش الأبيض
وترك اليوم الأسود
***
كنّا صغار
وكان البيت كبير
وبيساع أجنحة وأحلام
ونشوف الأمل جايي
متل الشمس جايي
متل رجعة بيي ع البيت جايي
مع الأغاني والمواعيد
كبرنا وضاع الحلم
وصرنا نعدّ الأيام
ونعدّ المصايب والهزايم
معقول اللي عم بيصير فينا
يا ريت كل اللي صار كذب
يا ريت يكون منام
ونفيق وما ينقص حدا منا
يا ريت يطلع الضو
ياريت تشتّي الدني
