اشترِك في نشرتنا الإخبارية
مسلسل البث المباشر مستمر على الشاشات والإذاعات، وصار الكل يحلل ويمحّص ويحمّص لدرجة انو في محلل جديد طلب تسليم السياسيين الى محكمة الشعب المش موجودة أصلا لكي تتم محاكمتهم من قبله، ويمكن كمان يريد تنفيذ حكم الإعدام بيديه العاريتين. و"روق يا كلينت روق"، هلق صحيح هناك مطالب محقة، وفي زبالة مش بس بالشوارع، في وين ما كان يخزي العين، والنَّاس اختنقت من القهر والقلة، لكن حضارة التصرف مطلوبة وبشدة، والتفرد بأخذ القرارات على العمياني لا يعتبر ديموقراطية إنما ديكتاتورية بامتياز. يعني انا بدي شيل وزير وابعتو على البيت، وشوفو هالعمل البطولي كيف حلّ كل المشاكل، وكل الفاسدين الحقيقيين يللي أوصلوا زبالة البلد الى داخل البيوت وغرف النوم ما إلهن دخل بالموضوع. هون وبدون شك في قطبة مخفية خلف هذا التحرك، وما يلفت النظر تكاثر المنظمات التي تحمل عناوين مختلفة لدرجة انني شخصيا قررت إنشاء جمعية "لعيت نفسي" لتشارك في السباق المحموم. و"لعيت نفسي" تعلم جيدا ان من يطالب بحقوق الشعب لا يحطم املاك الشعب، وسوف تتخذ الجمعية الموقف المناسب من السياسيين الجدد اصحاب المبادرات غير المدروسة في الوقت المناسب. وبما ان أعداد المحللين السياسيين الجدد يتكاثرون يوما بعد يوم، والأفق بالكاد يتسع لنظرياتهم، عندي صديق من الطايفة الأرمنية كمان حلل وأخبرني بالحرف الواحد: شوف على الاكيد في حدا بدّو فوضى بالبلد وهيدا الحدا عندو ماما واحد وبابا كتير، ولما استفهمت عن ماما واحد وبابا كتير أجاب بحدة: بالعربي الفصيح ابن حرام. لذلك تحميل وزير وزر سنوات فساد طويلة مش كتير راكبة خصوصي انو الزلمي بعد ما سخن مطرحو و"روق يا كلينت روق".
